သဵင်ႁူဝ်ၸႂ်ပေႃႈ ဢၼ်တိုၵ်ႉငိၼ်းၼႂ်းႁူ

သဵင်ႁူဝ်ၸႂ်ပေႃႈ ဢၼ်တိုၵ်ႉငိၼ်းၼႂ်းႁူ 

ၵၢင်ၼႂ်ၸဝ်ႉဝၼ်းသုၵ်း ၶႃႈလုၵ်ႉတိုၼ်ႉၶိုၼ်ႈမႃး လူၺ်ႈတင်းၸႂ်ဢမ်ႇပေႃးလီၵႃႈႁိုင်၊ ၶႃႈလွမ်မႆႈၸႂ်ယူႇ ၵွပ်ႈဝႃႈထႅင်ႈသွင်ဝၼ်းၵေႃႈ တေထိုင်ဝၼ်းဢၼ်ၶႃႈ တေလႆႈတွပ်ႇၶဝ်ႈၸၼ်ႉၸွမ်ယဝ်ႉ၊ ပဵၼ်ဝၼ်းဢၼ်ၶႃႈမုင်ႈမွင်းမႃး ပဵၼ်ၶၢဝ်းယၢမ်းသွင်ပီ၊ ၼႂ်းၶၢဝ်းတၢင်းသွင်ပီႈၼၼ်ႉ ၶႃႈလႆႈၶတ်းၸႂ်ႁဵၼ်းလိၵ်ႈတေႉꧦဝႃႈꧦ၊ ၼိုင်ႈဝၼ်းၶႃႈလႆႈၸႂ်ႉၶၢဝ်းယၢမ်းတူၺ်းလိၵ်ႈထိုင် ႑႐ ၸူဝ်ႈမူင်း၊ တွၼ်ႈတႃႇယိူင်းမၢႆဢၼ်လဵဝ်၊ ဢၼ်ပေႃႈၶႃႈမုင်ႈမွင်း ႁႂ်ႈၶႃႈလႆႈတွပ်ႇလိၵ်ႈ ၶဝ်ႈႁဵတ်းၼႂ်းၸၼ်ႉၸွမ် ဢၼ်ၸိုဝ်ႈလိုဝ်းလင် မိူၼ်ၼင်ႈပေႃႈမုင်ႈမွင်းဝႆႉၼၼ်ႉ။

ၶၢဝ်းတၢင်းသွင်ပီ ၼႂ်းသွင်လိူၼ်လိုၼ်းသုတ်းၼၼ်ႉ၊ ၶႃႈလႆႈၸႂ်ႉၶၢဝ်းယၢမ်းတူၺ်းလိၵ်ႈ ၼႂ်းၵၢၼ်လဵပ်ႈႁဵၼ်း ႁႃတၢင်းႁူႉၶွင်ၶႃႈ ၼိုင်ႈဝၼ်းထိုင် ႑႖ ၸူဝ်ႈမူင်းတဵမ်ꧦ၊ ၼင်ႈႁိုဝ်ႈပေႃးတေတွပ်ႇလႆႈ မၢတ်ႈသုင်လိူဝ်ပိူၼ်ႈၼၼ်ႉယဝ်ႉ၊ ၶႃႈလႆႈၼွၼ်း ႁိမ်းသၢမ်မူင်းၸဝ်ႉ ၼႃႈမိူင်းလႅင်းၵူႈၶိုၼ်း၊ ၵူၺ်းၵႃႈၼႂ်းၵူႈၶိုၼ်းၼၼ်ႉ ပေႃႈၶႃႈတေဝႆႉၵၢၼ်ဝႆႉငၢၼ်းသူၼ်ႇတူဝ်မၼ်းသေ မႃးၼင်ႈပႂ်ႉပၼ်ႁႅင်းၶႃႈယူႇ၊ ပေႃးပေႃႈၶႃႈမႃးၶမ်ႈလႂ်ၵေႃႈ ၽျေႃႇၵေႃႇၽီႇ ဢုၼ်ႇꧦၶူမ်ꧦသေ မႃးတမ်းဝႆႉတင်းၼႃႈၶႃႈယဝ်ႉ ဢဝ်မိုဝ်းလုပ်ႈႁူဝ် တွႆႇမႃႇၶႃႈသေလၢတ်ႈဝႃႈ "ၶတ်းၸႂ်ၶႃႈလုၵ်ႈ ပေႃႈပၼ်ႁႅင်းၸႂ်ယူႇ" ၼႆသေ ၼင်ႈပႂ်ႉတင်းၶၢင်ႈပၼ်ႁႅင်းၶႃႈယူႇယဝ်ႉ။

မၢင်ၶိုၼ်းၵေႃႈ ၶႃႈတူၺ်းလိၵ်ႈထိုင်မိူင်းလႅင်း၊ ပေႃႈၶႃႈၵေႃႈတေလၢတ်ႈဝႃႈ "ၼွၼ်းလႆႈယဝ်ႉလုၵ်ႈ ယႃႇပေပေႃးၼွၼ်းလိုၵ်းၼႃႇၽႅဝ် ၵူဝ်ဢမ်ႇယူႇလီ၊ ဝႆႉၸႂ်ယဵၼ်ꧦၼႃႈ ယႃႇပေႃးဝူၼ်ႉၼမ်" ၼႆယူႇ၊ ၶႃႈလႆႈငိၼ်းၶေႃႈၵႂၢမ်းၼၼ်ႉယူႇၵူႈၶိုၼ်း မၢင်ၶိုၼ်းၵေႃႈလူမ်းၸႂ်လမ်ပေႃးဢွၵ်ႇ ၵွပ်ႈဢၼ်ၸႂ်ႉၶႃႈၼွၼ်းယူႇတိၵ်းꧦ။ မိူဝ်ႈၶမ်ႈဝႃးၵေႃႈ ပဵၼ်မိူၼ်ၵူႈၶိုၼ်းဢၼ်ပူၼ်ႉမႃး၊ ပေႃႈၶႃႈၵေႃႈၽျေႃႇၵေႃႇၽီႇမႃးပၼ်ၶႃႈသေ ၼင်ႈႁိမ်းၶၢင်ႈပၼ်ႁႅင်းၶႃႈယူႇ၊ ၵူၺ်းၵႃႈၶမ်ႈၶိုၼ်းမိူဝ်ႈဝႃးၼၼ်ႉ တေပိူင်ႈၵၼ်တင်းၵူႈၶမ်ႈဢိတ်းၼိုင်ႈ ယွၼ်ႉၵွပ်ႈပေႃႈၶႃႈ ၵႂၢမ်းၼမ်ၸွမ်းမႄႈတင်ႈၶမ်ႈသေ လိုၵ်ႈမႃးၸင်ႇမႃးၼင်ႈၸွမ်းၶႃႈ။

မိူဝ်ႈၼႆႉဝၼ်းသုၵ်း ထႅင်ႈသွင်ဝၼ်းၵူၺ်း ၶႃႈၵေႃႈတေလႆႈတွပ်ႇလိၵ်ႈယဝ်ႉ၊ ယၢမ်းၵၢင်ၼႂ်ၸဝ်ႉ မိူဝ်ႈၶႃႈပႆၽၢတ်ႈပေႃႈၶဝ်ႈႁွင်ႈၼမ်ႉၼၼ်ႉ ၶႃႈဝူၼ်ႉမီးလွင်ႈတေလၢတ်ႈတေႃႇပေႃႈ မၢင်ၸိူဝ်းမၢင်လွင်ႈၼႂ်းႁူဝ်ၸႂ်ၶႃႈယူႇ၊ ၵူၺ်းၵႃႈ သမ်ႉဢမ်ႇမီးတိုဝ်ႉတၢင်းလႆႈလၢတ်ႈ၊ ၶႃႈပႆႇၶဝ်ႈႁွင်ႈၼမ်ႉသေ သီၶဵဝ်ႈ ဢၢပ်ႇၼမ်ႉ ယဝ်ႉယဝ်ႈ၊ ၽိူဝ်ႇၶႃႈဢွၵ်ႇမႃးၵေႃႈ ပေႃႈပေႃးဢွၵ်ႇၵႂႃႇႁဵတ်းၵၢၼ်ယဝ်ႉ။ ၵူၺ်းမိူဝ်ႈၼႆႉပဵၼ်ဝၼ်းဢၼ်ၶႃႈမီးတၢင်းသိူဝ်းၸႂ်ဢိတ်းၼိုင်ႈယူႇ၊ ၵွပ်ႈဝႃႈၶႃႈၸၢမ်းတွပ်ႉတူၺ်း ၶေႃႈထၢမ်ၵဝ်ႇ ဢၼ်ပူၼ်ႉမႃးသွင်ပီၼၼ်ႉ ၶႃႈတွပ်ႇလႆႈလီၵူႈၶေႃႈ ၼမ်လိူဝ်သေဢၼ်ၶႃႈဝူၼ်ႉဝႆႉၼၼ်ႉတေႉꧦ။ ပေႃးထိုင်ႈ ႑႑ မူင်းၵႂႃႇယဝ်ႉၼႆ ၶႃႈတေလိုဝ်ႈႁိူဝ်ႉလိုဝ်ႈၸႂ်ယဝ်ႉ ၵွပ်ႈဝႃႈ ထႅင်ႈသွင်ဝၼ်းၵူၺ်းၵေႃႈ တေလႆႈတွပ်ႇလိၵ်ႈယဝ်ႉ၊ ၶႃႈဢမ်ႇၶႂ်ႈဝူၼ်ႉၼမ်ၶမ်ၸႂ်လွင်ႈသင် ၵူဝ်တွပ်ႇလိၵ်ႈဢမ်ႇလႆႈၼင်ႇၸႂ်။

ၶႃႈၼွၼ်းလိုဝ်ႈႁိူဝ်ႉလိုဝ်ႈၸႂ်ယူႇၼိူဝ်ၸၼ်ႉသွင်၊ ၼွင်ႉၸၢႆးၶိုၼ်ႈမႃးလၢတ်ႈဝႃႈ ပေႃႈဢဝ်ၶဝ်ႈၽၵ်းဝေႉမႃးပၼ်တင်းတႂ်ႈ၊ မိူဝ်ႈၼၼ်ႉၼႂ်းၸႂ်ၶႃႈၵေႃႈ မီးလွင်ႈၶႂ်ႈလၢတ်ႈတေႃႇပေႃႈယူႇ၊ ၵူၺ်းသမ်ႉဝူၼ်ႉဝႃႈ ထႅင်ႈဢိတ်းၼိုင်ႈၵေႃႈလူင်းၵႂႃႇလၢတ်ႈတေႃႇၵႃႈၼႆယူႇ၊ ၶႃႈယူႇဢမ်ႇႁိုင် ၽိူဝ်ႇၶႃႈလူင်းမႃး ပေႃႈၶႃႈၵေႃႈပေႃးဢွၵ်ႇၵႂႃႇႁဵတ်းၵၢၼ်ထႅင်ႈယဝ်ႉ၊ ၶႃႈၵေႃႈၶိုၼ်းၶိုၼ်ႈမိူဝ်းၼင်ႈတူၺ်းငဝ်းတူင်ႉ တေႃႇပေႃးထိုင် ဝၢႆႇသၢမ်မူင်း၊ ယူႇၵမ်းၼိုင်ႈၵေႃႈ ငိၼ်းသဵင်ၾူၼ်းလင်မေႃးမႃး ႁိမ်းၶၢင်ႈၶႃႈ၊ ၶႃႈႁပ်ႉသေထွမ်ႇတူၺ်း ပဵၼ်သဵင်ၽူႈယိင်းလၢတ်ႈ မိူၼ်လၢတ်ႈဢွၵ်ႇၸိုဝ်ႈပေႃႈၶႃႈ ယဝ်ႉၵေႃႈလၢတ်ႈဝႃႈ ပေႃႈၶႃႈဢဝ်လူတ်ႉပိၼ်ႈ၊ ၵွပ်ႈငွၵ်းႁူဝ်မၼ်းဝေႈ လုၵ်ႈဢွၼ်ႇၶၢမ်ႈတၢင်း။

ၶႃႈဝူၼ်ႉၼႂ်းၸႂ်ၶႃႈ ပေႃႈတေဢမ်ႇပဵၼ်သင်ၵႃႈႁိုဝ်ၼႆယူႇ၊ ၶႃႈႁိပ်ႈၼႅတ်ႈၵႂႃႇတီႈႁူင်းယႃၵမ်းလဵဝ်၊ ပေႃးၶႃႈထိုင်ႁူင်းယႃယဝ်ႉၵေႃႈ မေႃယႃၶဝ်ႈၵေႃႈ ဢဝ်ဝႂ်ယွၼ်းၶႂၢင်ႉတႃႇတေၾႃႇတတ်း မႃးပၼ်ၶႃႈၵမ်းလဵဝ်၊ ဝႆးၶႃႈလူင်းလၢႆးမိုဝ်းယဝ်ႉၵေႃႈ ဢဝ်ပေႃႈၶႃႈ ၶဝ်ႈႁွင်ႈၾႃႇတတ်းၵႂႃႇၵမ်းလဵဝ်၊ ၶႃႈဢမ်ႇတၼ်းႁၼ်ၼႃႈပေႃႈသေဢိတ်း၊ ထိုင်ႁူဝ်ၶမ်ႈမႃး မေႈၶႃႈမႃးတီႈႁူင်းယႃသေ ႁႂ်ႈၶႃႈမိူဝ်းပႂ်ႉတီႈႁိူၼ်း မီးသင်ၵေႃႈတေသိုပ်ႇၾူၼ်းႁႃၼႆလႄႈ ၶႃႈၵေႃႈလႆႈမႃးၼွၼ်းတီႈႁိူၼ်းၼႂ်းၶိုၼ်းၼၼ်ႉ။

ၵၢင်ၼႂ်ၸဝ်ႉဝၼ်းသဝ် မေႈၶႃႈထူဝ်းမႃးလၢတ်ႈဝႃႈ "ပေႃႈသူလီၶိုၼ်ႈယဝ်ႉ ၵူၺ်းၵႃႈပႆႇႁူႉတူဝ် မိူဝ်ႈလဵဝ်ၼွၼ်းယူႇႁွင်ႈ ICU,။ ၶႃႈၵေႃႈတႅပ်းတတ်းၸႂ်လၢတ်ႈတီႈမႄႈဝႃႈ ဝၼ်းၸၼ်ၼႆႉၶႃႈတေဢမ်ႇၶဝ်ႈတွပ်ႇလိၵ်ႈယဝ်ႉ၊ ၶႃႈၶႂ်ႈၵႂႃႇပႂ်ႉတူၺ်းတၢင်းပဵၼ်ပေႃႈတီႈႁူင်းယႃ ၼႆယူႇ၊ မႄႈၸႂ်ႉဢၢဝ်ႁဝ်းပႂ်ႉတူၺ်းပေႃႈ တီႈႁူင်းယႃယဝ်ႉ ၼႅတ်ႈမႃးတီႈႁိူၼ်းၵမ်းလဵဝ်၊ ထိုင်ႁိူၼ်းယဝ်ႉၵေႃႈ လၢတ်ႈတီႈၶႃႈဝႃႈ ꧦၸွင်ႇႁူႉႁိုဝ် ဝႃႈပေႃႈလုၵ်ႈၶႂ်ႈႁႂ်ႈလုၵ်ႈ တွပ်ႇၶဝ်ႈၸၼ်ႉၸွမ်ၼၼ်ႉၵႃႈႁိုဝ်၊ ဢၼ်လႆႈပဵၼ်ၵႂႃႇမိူဝ်ႈၼႆႉ ယွၼ်ႉပေႃႈသူၼႅၼ်ႈၵႂႃႇလႂ်လႄႈပဵၼ် လုၵ်ႈသမ်ႉၸွင်ႇႁူႉႁႃႉ ?၊ ၶႃႈၵေႃႈတွပ်ႇဝႃႈဢမ်ႇႁူႉ။ မႄႈလၢတ်ႈႁႂ်ႈၶႃႈ ၶဝ်ႈတွပ်ႇလိၵ်ႈမိူဝ်ႈၽုၵ်ႈ၊ ယဝ်ႉၵေႃႈမႄႈလၢတ်ႈထႅင်ႈဝႃႈ "ဢၼ်ပေႃႈသူလႆႈထူပ်းၽေးၵိုင်ႉၵၢင်ႉၼၼ်ႉ ယွၼ်ႉမၼ်းတေၵႂႃႇတႆႈတဵၼ်း ယွၼ်းသူးႁႂ်ႈလုၵ်ႈတွပ်ႇလိၵ်ႈဢွင်ႇ၊ ၵူၺ်းသမ်ႉဢမ်ႇတၼ်းထိုင်သေ လႆႈထူပ်းၽေးၵိုင်ႉၵၢင်ႉၵႂႃႇဢွၼ်းတၢင်း"၊  မႄႈလၢတ်ႈထႅင်ႈဝႃႈ "သင်ဝႃႈပေႃႈသူႁူႉတူဝ်မႃးယဝ်ႉ သမ်ႉႁူႉဝႃႈလုၵ်ႈဢမ်ႇၶဝ်ႈတွပ်ႇလိၵ်ႈၼႆ ပေႃႈသူတေၽိတ်းၸႂ်ၵႃႈႁိုဝ်။ ၶႃႈလႆႈငိၼ်းၵႂၢမ်းၼၼ်ႉယဝ်ႉၵေႃႈ ၼႅတ်ႈတႅပ်းတတ်းၸႂ် ႁပ်ႉၵႂၢမ်းတီႈမႄႈဝႃႈ ၶႃႈတေၶဝ်ႈတွပ်ႇၼႆသေ၊ ၶႃႈပႆၶဝ်ႈၵႂႃႇၼႂ်းႁွင်ႈၼမ်ႉယဝ်ႉ ၼင်ႈႁႆႈယူႇတင်းႁိုင်၊ ဝူၼ်ႉဝႃႈပဵၼ်ပွၵ်ႈဢွၼ်တၢင်းသုတ်းယဝ်ႉ ဢၼ်ၶႃႈတေထူပ်းလွင်ႈ တုၵ်ႉၸႂ်ယႂ်ႇလူင်ၼႂ်းၸၢတ်ႈပၢၼ်ၶႃႈ။

ဝၼ်းဢႃးတိတ်ႉ မႄႈၶႃႈသိုပ်ႇၾူၼ်းမႃးလၢတ်ႈဝႃႈ ပေႃႈႁူႉတူဝ်ယဝ်ႉ၊ ၵူၺ်းပႆႇပၼ်ၶႃႈၵႂႃႇၸႂ်း၊ မႄႈလၢတ်ႈဝႃႈ "ပႂ်ႉႁႂ်ႈၶႃႈတွပ်ႇလိၵ်ႈယဝ်ႉၵွၼ်ႇ၊ တၢင်းၼႆႉလႄႈတင်းဢၢဝ်သူတေတူၺ်းထိုင်ၵူၺ်း ယႃႇမႆႈၸႂ်" ၼႆယူႇ၊ ၶႃႈၵေႃႈၸႂ်လီၶိုၼ်ႈမႃးဢိတ်းၼိုင်ႈ ငိၼ်းဝႃႈပေႃႈႁူႉတူဝ်ယဝ်ႉ၊ ၶႃႈလွမ်ဝူၼ်ယူႇဢၼ်ၼိုင်ႈ သင်ဝႃႈပေႃႈႁူႉဝႃႈ ၶႃႈတွပ်ႇလိၵ်ႈလႆႈ ပေႃႈတေလီၸႂ်ၸွမ်းၵႃႈႁိုဝ်ၼႆယူႇ၊ ၶႃႈၵေႃႈသမ်ႉတွပ်ႇလႆႈၵူႈဝၼ်း၊ တၢင်းပဵၼ်ပေႃႈၵေႃႈ လီၶိုၼ်ႈမႃး ၵူႈဝၼ်းꧦ၊ ၵူၺ်းၵႃႈ မႄႈၶႃႈၵေႃႈဢမ်ႇပၼ်ၶႃႈၵႂႃႇၸႂ်းလႃးꧦ၊ ႁၢၼ်ႉတေႃႇၶႃႈပေႃးတွပ်ႇလိၵ်ႈယဝ်ႉ ၼႂ်းၶၢဝ်းတၢင်းႁႃႈဝၼ်း၊ ဝၼ်းလိုၼ်းသုတ်းဢၼ်ၶႃႈတွပ်ႇလိၵ်ႈယဝ်ႉၼၼ်ႉ၊ ၶႃႈၵေႃႈၼႅတ်ႈၵႂႃႇတီႈႁူင်းယႃၵမ်းလဵဝ် သိူဝ်ႈၶူဝ်းၵေႃႈ ဢမ်ႇတၼ်းလႆႈလၢႆႈ။

ပေႃးၶႃႈထိုင်ႁူင်းယႃယဝ်ႉၵေႃႈ မႄႈထၢမ်ၶႃႈဝႃႈ "တွပ်ႇလိၵ်ႈယဝ်ႉႁလုၵ်ႈ"  ၶႃႈၵေႃႈတွပ်ႇဝႃႈ "တွပ်ႇယဝ်ႉမူတ်းယဝ်ႉၶႃႈ ၵူၺ်းၵႃႈဢမ်ႇပေႃးမိူၼ်ၸႂ်ၵႃႈႁိုဝ် ၵူၺ်းယုမ်ႇၸႂ်ယူႇၶႃႈ ဝႃႈတေဢွင်ႇပူၼ်ႉယူႇ" ၵမ်းၼၼ်ႉ မႄႈၵေႃႈပၼ်ၶႃႈၶဝ်ႈႁွင်ႈၵႂႃႇတူၺ်းပေႃႈ၊ ၽိူဝ်ႇၶႃႈႁၼ်ပေႃႈယဝ်ႉ ၶႃႈၸုၵ်းသေၶႅင်ယူႇတင်းႁိုင် ဢမ်ႇၸၢင်ႈယၢင်ႈၵႂႃႇၼႃႈ၊ ၶႃႈႁၼ်ပေႃႈႁူၼ်ႁူဝ်လိူမ်ႈသေ ၸွမ်းႁူဝ်ပေႃႈၼၼ်ႉ ပဵၼ်ဝႆႉႁွႆးၶဵမ်ဢၼ်ၾႃႇတတ်းၼၼ်ႉလူင်ၵႂႃႇသဵင်ႈ၊ ပေႃႈၶႃႈဢမ်ႇပႆႇႁူဝ်တူဝ်၊ မႄႈလၢတ်ႈဝႃႈ "ၶႂၢင်းပၼ်မႄႈဢိတ်းၼိုင်ႈၼႃႈလုၵ်ႈ ဢၼ်မေႈလၢတ်ႈဝႃႈ ပေႃႈသူႁူႉတူဝ်ယဝ်ႉ ၵူၺ်းမိူဝ်ႈလဵဝ်သမ်ႉ ပေႃႈသူဢမ်ႇပႆႇႁူႉတူဝ်"၊ ၶႃႈပႆၶဝ်ႈၵႂႃႇၸမ်ꧦၵေႃႈသေ ယိပ်းမိုဝ်းပေႃႈယဝ်ႉ ၼမ်ႉတႃၶႃႈၵေႃႈၵိင်ႈလူင်းမႃးၵမ်းလဵဝ်၊ ၶႃႈလၢတ်ႈတီႈပေႃႈဝႃႈ ၶႃႈတွပ်ႇလိၵ်ႈယဝ်ႉမူတ်းယဝ်ႉၼႃႈပေႃႈ ၼႅတ်ႈတိုၼ်ႇၶိုၼ်ႈမိုၼ်းတႃ မႃးတူၺ်း မၢႆဢွင်ႇမၼ်းၸွမ်းၵၼ်ၶႃႈၼႃပေႃႈ"။ 

ၵူၼ်းၵူႈၵေႃႉၼႂ်းႁွင်ႈၼၼ်ႉ မုင်ႈႁၼ်ၼိဝ်ႉမိုဝ်းပေႃႈတူင်ႉꧦသေ ဢွၼ်ၵၼ်လၢတ်ႈဝႃႈ ပေႃႈႁူႉတူဝ်ယဝ်ႉ၊ မေႃယႃၶဝ်ၵေႃႈ ၼႅတ်ႈမႃးတူၺ်းပေႃႈၵမ်းလဵဝ် ယဝ်ႉၵေႃႈလၢတ်ႈဝႃႈ "မိူဝ်ႈလဵဝ်ၼႆႉဢမ်ႇပေႃးလူဝ်ႇမႆႈၸႂ်ယဝ်ႉၶႃႈ လုင်းလွတ်ႈၽေးလီယဝ်ႉ" ၼႆလႄႈ ၶႃႈၵေႃႈလီၸႂ်ၶိုၼ်ႈမႃးဢိတ်းၼိုင်ႈ၊ ၶိုၼ်းၼၼ်ႉၶႃႈၵေႃႈပွၵ်ႈမိူဝ်းၼွၼ်းတီႈႁိူၼ်းၸွမ်းမႄႈ၊ မိူင်းလႅင်းမႃးၵေႃႈ မႄႈၼႅတ်ႈလုၵ်ႉၵႂႃႇႁူင်းယႃၵမ်းလဵဝ်၊ မႄႈထိုင်ႁူင်းယႃယဝ်ႉ သိုပ်ႇၾူၼ်းမႃးလၢတ်ႈၶႃႈဝႃႈ "မိူဝ်ႈၵၢင်ၶိုၼ်းၵူၼ်းဢၼ်ၼွၼ်းတီႈၵူႈ ႁိမ်းၶၢင်ႈတီႈၼွၼ်းပေႃႈသူၼၼ်ႉ ႁၼ်ပေႃႈသူမိုၼ်းတႃသေ တူၺ်းသၢႆႉ တူၺ်းၶႂႃယူႇၼႆဝႃႇ"  ၊ မႄႈၶႃႈၵေႃႈတူၺ်းလႅမ်ႈလီၸႂ်တေႉꧦ၊ ၶႃႈလၢတ်ႈတီႈမႄႈဝႃႈ ၸမ်ꧦပႅတ်ႇမိူင်းၶႃႈၸင်ႇတေႉၵႂႃႇၼႆယူႇ၊ ယူႇထႅင်ႈဢိတ်းၼိုင်ႈ ၸမ်ꧦၸဵတ်းမူင်း မႄႈၶႃႈသိုပ်ႇၾူၼ်းမႃးထႅင်ႈၵမ်းၼိုင်ႈ လၢတ်ႈဝႃႈႁႂ်ႈဢဝ် ၶူဝ်းၸုမ်ႇမႂ်ꧦ လႄႈတင်းသိူဝ်ႈၼႃႇႁူမ်ႇၶွင်ပေႃႈ မႃးၸွမ်းၼႆယဝ်ႉ၊ ၵမ်းၼၼ်ႉၶႃႈၵေႃႈ ၼင်ႈလူင်းတီႈၼၼ်ႈသေ ငဝ်မိုင်ထိုင်ၼမ်ႉတႃ ပေႃးတူၵ်းလူင်းမႃး ၵွပ်ႈၶႃႈႁူႉဝႃႈမႄႈၶႂ်ႈလၢတ်ႈထိုင်သင်။

ၶႃႈႁူႉဝႃႈ ၶႃႈလႆႈသုမ်းၵူၼ်းဢၼ်ၶႃႈႁၵ်ႉသေပိူၼ်ႈ ၼႂ်းၸၢတ်ႈပၢၼ်ၶႃႈယဝ်ႉ၊ ၶႃႈဢမ်ႇမီးတိုဝ်ႉတၢင်း တႃႇတေလႆႈလၢတ်ႈတေႃႇၶဝ်ထႅင်ႈယဝ်ႉ၊ ပေႃႈပႂ်ႉတေႃႇထိုင် ဝၼ်းၶႃႈတွပ်ႇလိၵ်ႈယဝ်ႉ၊ ပေႃႈပႂ်ႉတေႃႇထိုင် ၶႃႈၵႂႃႇလၢတ်ႈဝႃႈ ၶႃႈတွပ်ႇလိၵ်ႈယဝ်ႉမူတ်းယဝ်ႉ၊ ပေႃႈၸင်ႇယၢၼ်းၶႃႈၵႂႃႇယဵၼ်ꧦ၊ ပဵၼ်ပွၵ်ႈလဵဝ်ၼႂ်းၸၢတ်ႈပၼ် ဢၼ်ၶႃႈႁွင်ႉႁႆႈႁႅင်းသေပိူၼ်ႈ ၵွပ်ႈၶႃႈလူႉသုမ်းၵေႃႉဢၼ်ၶႃႈႁၵ်ႉသေပိူၼ်ႈ၊ တွၼ်ႈတႃႇၶႃႈတေဢမ်ႇမီးၽႂ် ၽျေႃႇၵေႃႇၽီႇ ဢုၼ်ႇꧦၶူမ်ꧦ မႃးပၼ်ထႅင်းယဝ်ႉ၊ တေဢမ်ႇမီးၽႂ်ပႂ်ႉပၼ်ႁႅင်းၶႃႈၽွင်းၶႃႈငဝ်ထႅင်ႈယဝ်ႉ၊ တေဢမ်ႇမီးၽႂ် ဢဝ်မိုဝ်းလုပ်ႈႁူဝ် တွႆႇမႃႇၶႃႈသေ လၢတ်ဝႃႈ ၶတ်းၸႂ်ꧦၼႃႈလုၵ်ႈ ပေႃႈပၼ်ႁႅင်းၸႂ်ယူႇၼႆထႅင်ႈယဝ်ႉ၊ ၶႃႈတေဢမ်ႇမီးဝၼ်းတေလႆႈလွင်ႈဢုၼ်ႇၸႂ် ၸိူဝ်းၼၼ်ႉထႅင်ႈယဝ်ႉ၊ တီႈတေႉၶဝ်ၵေႃႉၼၼ်ႉ ပဵၼ်ၵေႃႉဢၼ်ၶႃႈႁၵ်ႉသေပိူၼ်ႈၵေႃႉၼိုင်ႈ၊ ဢဝ်ၼႆႉၵႂႃႇၼႃႈၶႃႈတေဢမ်ႇမီးတိုဝ်ႉတၢင်း လႆႈလၢတ်ႈဝႃႈ "ပေႃႈ" ၼႆထႅင်ႈယဝ်ႉ။

ယူႇၵႂႃႇယူႇမႃး ၶၢဝ်းယၢမ်းပူၼ်ႉမႃးယဝ်ႉ သိပ်းပီ၊ မီးလွင်ႈလဵဝ်ဢၼ်ႁဵတ်းႁႂ်ႈၶႃႈၸဵပ်းၸႂ်ထိုင်ဝၼ်းၼႆႉ၊ ပဵၼ်ၵၢင်ၼႂ်ၸဝ်ႉ ဝၼ်းသုၵ်း ၼႃႈႁွင်ႈၼမ်ႉ မိူဝ်ႈသိပ်းပီပူၼ်ႉမႃး၊ မိူဝ်ႈၶႃႈပႆၽၢတ်ႈပေႃႈၶဝ်ႈႁွင်ႈၼမ်ႉ လူၺ်ႈဢမ်ႇလႆႈလၢတ်ႈၵႂၢမ်းသင် သေၶေႃႈ၊ တီႈတေႉၶႃႈထုၵ်ႇလီလၢတ်ႈတီႈပေႃႈဝႃႈ "ၶႃႈႁၵ်ႉပေႃႈသေပိူၼ်ႈ" ၵူၺ်းၵႃႈၶႃႈသမ်ႉဢမ်ႇလၢတ်ႈသင်သေ ပႆၽၢတ်ႈၵႂႃႇလၢႆꧦၵူၺ်း။ တေႇဢဝ်ၼၼ်ႉမႃး ၶႃႈဢမ်ႇယၢမ်ႈလိုမ်း လၢတ်ႈတီႈၵူၼ်းဢၼ်ၶႃႈႁၵ်ႉၼၼ်ႉဝႃႈ "ၶႃႈႁၵ်ႉၶဝ်တၢၼ်ႇႁိုဝ်ၼႆၼၼ်ႉ"၊ ၶႃႈတိုၼ်းတေဢမ်ႇယွမ်းသုမ်းၵေႃႇဢၼ်ၶႃႈႁၵ်ႉၼၼ်ႉ လူၺ်းဢမ်ႇလႆႈလၢတ်ႈဝႃႈႁၵ်ႉၶဝ်တၢၼ်ႇႁိႃဝ်။ မိူဝ်ႈမီးလွင်ႈတေလၢတ်ႈတီႈၵူၼ်းၵေႃႉၼိုင်ႈဝႃ "ႁၵ်ႉၶဝ်" ၼႅတ်ႈလၢတ်ႈမိူဝ်ႈမီးၶၢဝ်းယၢမ်းလႄႈ ၵူဝ်လႆႈသုမ်းၵေႃႉဢၼ်ႁၵ်ႉၼၼ်ႉထႅင်ႈလူၺ်းဢမ်ႇလႆႈလၢတ်ႈဝႃႈႁၵ်ႉၶဝ်တၢၼ်ႇႁိုဝ်။

ၸိူင်းၼႆဢိင်ၼိူဝ် ၸိူင်းငဝ်းတူင်ႉၵမ်ႉၽွင်ႈသေ တႅမ်ႈဢွၵ်ႇမႃးၵူၺ်း ဢမ်ႇၸႂ်ႈဝႃႈတူဝ်ထူပ်းၶႃႈႁဝ်း၊ ၵူၺ်းၵႃႈၸိူင်ႉႁိုဝ်ၵေႃႈလီ မိူဝ်ႈမီးၶၢဝ်းယၢမ်းလႄႈတိုဝ်ႉတၢင်းၼၼ်ႉ ထုၵ်ႇလီလၢတ်ႈဝႃႈ "ႁၵ်ႉၸိူဝ်းၶဝ်ၼႃႇ" ၼႆၵူႈဝၼ်းယူႇ၊ ၵွပ်ႈဝႃႈလွင်ႈၽၢတ်ႇယၢၼ်ၵၼ်ၼၼ်ႉ ႁဝ်းလၢတ်ႈဢမ်ႇလႆႈဝႃႈ မိူဝ်ႈၼၼ်ႉမိူဝ်ႈၼႆႉတေလႆႈၽၢတ်ႇယၢၼ်ၵၼ် ႁဝ်းၸၢင်ႈၽၢတ်ႇယၢၼ်ၵၼ်လႆႈၵူႈၶၢဝ်းၼၼ်ႉယဝ်ႉ။ 

ၸဝ်ႈၵွၼ်းၶမ်း ဢေႃးတိပ်ႉပ (မိူင်းသၢတ်ႇ)

14/ 7/ 2017