ၸၢတ်ႈပၢၼ် လႄႈ လွင်ႈၼွၼ်းၾၼ်
ၸၢတ်ႈပၢၼ်ၵူၼ်းႁဝ်းၵူႈၵေႃႉၼႆႉ ဢမ်ႇပိူင်ႈသင်ၵၼ်တင်း ၼွၼ်းၾၼ်၊ ၵွပ်ႈပိူဝ်ႈသင်လႃႇပေႃးၼႆႉ၊ ၵွပ်ႈၵူႈလွင်ႈပေႃႉပဵၼ်မႃးယဝ်ႉ ပူၼ်ႉသုတ်းၵႂႃႇ၊ ဢမ်ႇမီးသင်မၼ်ႈၵိုမ်း၊ ဢမ်ႇမီးသင်မၼ်ႈၵႅၼ်ႇ၊ ဢမ်ႇမီးလွၼ်ႉၵႅၼ်သင်၊ လွင်ႈၸိူဝ်းပူၼ်ႉၵႂႃႇၵေႃႈ ဢမ်ႇၸၢင်ႈတိုတ်ႉၸၼ်ၶိုၼ်းလႆႈ၊ ၽွင်းမိူဝ်းတိုၵ်ႉပဵၼ်ယူႇၼၼ်ႉတေႉ မိူၼ်ႁၢင်ႈၸိုင်ႈၸႂ်ႈဝႆႉ၊ ၵူၺ်းလွင်ႈၼၼ်ႉၵေႃႈပူၼ်ႉၵႂႃႇ ပဵၼ်လွင်ႈဢၼ်ပူၼ်ႉမႃး၊ ငၢႆးမိူၼ်လွင်ႈၼွၼ်းၾၼ်၊ ပဵၼ်မိူၼ်ၵူၼ်းၼွၼ်းလပ်း မိူဝ်ႈၽွင်းတိုၵ်ႉလပ်းၾၼ်ယူႇၼၼ်ႉ ဝူၼ်ႉဝႃႈၵူႈလွင်ႈၸိူဝ်းတိုၵ်ႉၾၼ် ပဵၼ်လွင်ႈၸိုဝ်ႈၸႂ်ႈ၊ ပဵၼ်လွင်ႈမၼ်ႈၵိုမ်း၊ ၽိူဝ်ႇတိုၼ်ႇၶိုၼ်ႈမိုၼ်းတႃယဝ်ႉ ၵူႈလွင်ႈၵေႃႈႁၢႆၵႂႃႇ၊ ဝၢႆးၼၼ်ႉၸင်ႇႁူႉတူဝ်ဝႃႈ လွင်ႈၼၼ်ႉပဵၼ်လွင်ႈၼွၼ်းၾၼ်၊ ဢမ်ႇၸႂ်ႈလွင်ႈတေႉ မၼ်းပဵၼ်လွင်ႈၼွၼ်းၾၼ်၊ ပဵၼ်လွင်ႈဢမ်ႇၸိုဝ်ႈၸႂ်ႈ၊ ပဵၼ်လွင်ႈဢမ်ႇမၼ်ႈၵိုမ်းၵူၺ်း။
ၵွပ်ႈၼၼ်လႄႈ ၸၢတ်ႈပၢၼ်ၵူၼ်းႁဝ်းၵူႈၵေႃႉၵေႃႈၼင်ႇၼၼ်၊ မိူဝ်ႈၽွင်းတိုၵ်ႉမီးသၢႆၸႂ်ယူႇၼၼ်ႉ ဝူၼ်ႉဝႃႈၵူႈၸိူဝ်းၵူႈလွင်ႈ ပဵၼ်လွင်ႈဢၼ်ၸိုဝ်ႈၸႂ်ႈ၊ ပဵၼ်လွင်ႈဢၼ်မၼ်ႈၵိုမ်း၊ ၶိုၼ်းလိုမ်းတူဝ်သေ ဝူၼ်ႉဝႃႈ ၵဝ်ပဵၼ်ၶႃႈ မႂ်းပဵၼ်ၶုၼ်၊ ၵဝ်ပဵၼ်ၵူၼ်းမီး မႂ်းပဵၼ်ၵူၼ်ၽၢၼ်၊ ၵဝ်ပဵၼ်ၵူၼ်းႁၢင်ႈလီ မႂ်းပဵၼ်ၵူၼ်းႁၢင်ႈၸႃႉ၊ ၼႆသေ ဝူၼ်ႉထၢင်ႇယႂ်ႇၼိူဝ်တူဝ်ၸဝ်ႈၵဝ်ႇယူႇ၊ လိုၼ်းသုတ်းမၼ်း ꧤိူဝ်ႇတၢႆတႃလိုမ်းမိူင်းယဝ်ႉ၊ ၸင်ႇတေႁူႉဝႃႈ ၼႂ်းၸၢတ်ႈပၢၼ်ၵူၼ်းႁဝ်းၼၼ်ႉ ဢမ်ႇမီးသင်မၼ်ႈၵိုမ်း၊ ဢမ်ႇမီးသင်ၸိုဝ်ႈၸႂ်ႈ၊ ဢမ်ႇမီးလွၼ်ႉၵႅၼ်သင် ပဵၼ်ၾၼ်လွၼ်ႉꧦၵူၺ်း ၼႆယူႇယဝ်ႉ။
ၸဝ်ႈၵွၼ်းၶမ်း ဢေႃးတိပ်ႉပ (မိူင်းသၢတ်ႇ)
႓/ ႗/ ႒႐႑႗ ႉႉႉ ႑႐ :႔႒
No comments:
Post a Comment