လွင်ႈတဵမ်ထူၼ်ႈဢမ်ႇၸႂ်ႈၶေႃႈတွပ်ႇ တင်းမူတ်းၼႂ်းၸၢတ်ႈပၢၼ်

လွင်ႈတဵမ်ထူၼ်ႈဢမ်ႇၸႂ်ႈၶေႃႈတွပ်ႇ တင်းမူတ်းၼႂ်းၸၢတ်ႈပၢၼ် 

ၵလိင်း ၵလိင်း ၵလိင်း (သဵင်ၾူၼ်း)

ႁႃလူဝ်...

မႄႈ... လုၵ်ႈၵိၼ်ၶဝ်ႈယဝ်ႉႁ?

လုၵ်ႈ... ပႆႇလႆႈၵိၼ်သင်မႄႈ၊

မႄႈ... ႁဵတ်းၵၢၼ်ၸွင်ႇႁိူဝ်ႉႁိုဝ်လုၵ်ႈ?

လုၵ်ႈ.... ၵေႃႈဢူဝ်ၶေယူႇမႄႈ၊

မႄႈ..... လုၵ်ႈယူႇလီယူႇႁ?

လုၵ်ႈ..... ၵေႃႈမိူၼ်ၼၼ်ယဝ်ႉဝႃႈမႄႈ၊

တေထၢမ်သင်လူင်လၢင် ၵႃႈၼႆႉၵွၼ်ႇမႄႈ တိုၵ်ႉသုၵ်ႉသၵ်ႉယူႇမိူဝ်ႈလဵဝ်။

(ၶေႃႈၵႂၢမ်းၵမ်းလိုၼ်းသုတ်း မိူဝ်ႈလုၵ်ႈတေဝၢင်းသၢႆမႄႈ)

တုတ်း တုတ်း တုတ်း (သဵင်ၾူၼ်း) 

မိူဝ်ႈၶႃႈတိုၵ်ႉမီးတၢင်းသိူဝ်းသေ ႁဵတ်းၵၢၼ်၊ လႆႈၸႂ်ႉၸၢတ်ႈပၢၼ်ယူႇၸွမ်းၵေႃႉၶႃႈႁၵ်ႉ၊ ဢွၼ်ၵေႃႉၶႃႈႁၵ်ႉ မူၼ်ႈၵျေႃႇ လေႇတီႈၼိုင်ႈယဝ်ႉတီႈၼိုင်ႈ၊ တီႈဢၼ်ၶႂ်ႈၵႂႃႇၸိူဝ်းၼၼ်ႉ ဢွၼ်ၵႂႃႇမူတ်းꧦ၊ သိူဝ်ႉၶူဝ်းၶွင် ဢၼ်ၵႃႈၶၼ်ယႂ်ႇꧦပၼ်၊ ၵႃႈဢၼ်ၶႂ်ႈလႆႈၼၼ်ႉ ၶႃႈသိုဝ်ႉပၼ်မူတ်းꧦ ဢမ်ႇဝႃႈၵႃႈၶၼ်မၼ်းတေယႂ်ႇၵႃႈႁိုဝ် တွၼ်ႈတႃႇၵေႃႉၶႃႈႁၵ်ႉၼၼ်ႉ။ 

ယူႇၵႂႃႇဝၼ်းၼိုင်ႈ မီးမၢႆၾူၼ်းဢၼ်လၢၵ်ႇလၢႆးၶဝ်ႈမႃး၊ ပဵၼ်သဵင်ၽူႈယိင်းတွင်ႈထၢမ်ၶႃႈဝႃႈ၊ ꧦၶႂၢင်းပၼ်ဢိတ်းၼိုင်ႈၶႃႈ ၸွင်ႇသူၸႂ်ႈပီႈၼွင်ႉၵၼ်တင်း ပႃႈသႅင်မွၼ်းၶႃႈႁ?ꧦ ၊ ၶႃႈၼၢင်းပဵၼ်မေႃယႃ မႃးႁၵ်ႉပႃႈၶႃႈဢေႃႈ၊ မီးၵူၼ်းသိုပ်ႇၾူၼ်းလၢတ်ႈဝႃႈ ႁၼ်ပႃႈသႅင်မွၼ်း ၼွၼ်းလိုမ်းတူဝ်ယူႇၼႂ်းဝၢင်းႁိူၼ်းၼၼ်ႉလႄႈ၊ မေႃယႃၸင်ႇဢဝ်မႃးတီႈ ႁူင်းယႃလူင်သေ ၵူတ်ႇထတ်း သွၵ်ႈႁႃတူၺ်းၼႂ်းၾူၼ်းပႃႈလႄႈ ႁၼ်မႅၼ်ႈၺႃး မၢႆၾူၼ်း ဢၼ်ၼႆႉတႅမ်ႈဝႆႉဝႃႈ ꧦ လုၵ်ႈႁၵ်ႉꧦ ၼႆၶႃႈလႄႈ ၸင်ႇၵပ်းသိုပ်ႇတူၺ်း ႁႂ်ႈမႃးတူၺ်း တၢင်းပဵၼ်ပႃႈတီႈႁူင်းယႃလူင်ၼႆႉ ၶႃႈဢေႃႈ။ꧦ

ꧦဢေႃႈၶႃႈ တေၼႅတ်ႈၵႂႃႇၶႃႈꧦ။ 

ꧦၶႃႈၼင်ႈလူင်းတီႈၼၼ်ႈ ၵမ်ႉၼိုင်ႈသေ တၢင်းဝူၼ်ႉဢၼ်ၼိုင်ႈၵေႃႈ ၶိုၼ်ႈႁူဝ်မႃးꧦ၊

ꧦႁၵ်ႉ ႁဝ်းပၼ်ၶေႃႈမၼ်ႈၵႅၼ်ႇၵၼ်ဝႆႉ ၼႆလၢတ်ႈဝႃႈတေၵႂႃႇလေႇ ပၢင်ႇလၢႆႇၸွမ်းၵၼ်ꧦ၊

ꧦထႅင်ႈသွင်ဝၼ်းသမ်ႉ ၶိင်း လၢတ်ႈၵၼ်ဝႆႉတင်းၵူၼ်းလူင် VIP ၶဝ်ꧦ၊
ꧦဝူင်ႈၼႃႈသမ်ႉ ၽူႈပွင်ၵၢၼ်လူင်ဝႃႈ တေၶိုၼ်ႈပၼ်ၸၼ်ႉထၢၼ်ႈꧦ၊
ꧦၼႆဝႃႈတေၵႂႃႇ Party ပၢင်ၵိၼ်ၵျေႃႇဝၼ်းၵိူတ်ႇတႆးၵေႃႉꧦ၊

ၽွင်းတိုၵ်ႉဝူၼ်ႉၵႂင်ယူႇၼၼ်ႉ ၶေႃႈထၢမ်ဢၼ်ၼိုင်ႈၵေႃႈ လႆႈၽုတ်းပေႃႇၶိုၼ်ႈမႃး ꧦသင်လႃႇလွင်ႈတဵမ်ထူၼ်ႈတွၼ်ႈတႃႇၸၢတ်ႈပၢၼ်မႂ်း?ꧦ

ၶႃႈဝၢင်းၽႃႈပႅတ်ႈၵူႈၸိူဝ်းၵူႈလွင်ႈ ဢၼ်ဝူၼ်ႉဝႃႈပဵၼ်လွင်ႈတဵမ်ထူၼ်ႈ၊ ပဵၼ်လွင်ႈၵျေႃႇမူၼ်ႈၼႂ်းၸၢတ်ႈပၢၼ်ၶႃႈသေ၊ ၼႅတ်ႈဢွၵ်ႇၶၢဝ်းတၢင်းၵႂႃႇႁႃ တီႈႁူင်းယႃဢၼ်မီးမႄႈယူႇၼၼ်ႉ၊  ၼႂ်းၶၢဝ်းတၢင်းၼၼ်ႉ ၶႃႈလွမ်ယွၼ်းသူး တိူင်ႇၵၢဝ်ႇၽႃၽီ ႁႂ်ႈပၼ်ၶၢဝ်းယၢမ်းၶႃႈ လႆႈထူပ်းမႄႈထႅင်ႈ ပွၵ်ႈၵမ်းလိုၼ်းသုတ်းထႅင်ႈပွၵ်ႈၼိုင်ႈၼႆယူႇ။
ၽိူဝ်ႇၶႃႈထိုင်ႁူင်းယႃလူင်ယဝ်ႉ ၶဝ်ႈၵႂႃႇၼႂ်းႁူင်းယႃလူင်သေ လႆႈမုင်ႈႁၼ်မေႃယႃလူင် ဢွၵ်ႇႁွင်ႈ ICU မႃးယဝ်ႉ လၢတ်ႈဝႃႈ ꧦမွင်ၸႂ်ၸွမ်းတေႉၼႃ မႄႈပႃႈၵႂႃႇႁွတ်ႈတီႈလီယဝ်ႉၶႃႈꧦ၊ ၼႂ်းၶၢဝ်းယၢမ်းၸူဝ်ႈၵႅပ်ႉၼၼ် ၶႃႈမိူၼ်ဢမ်ႇမီးဢဵၼ်ႁႅင်းလုၵ်ႉၸုၵ်းယဝ်ႉ၊ ၶႃႈၼင်ႈလူင်းတီႈၼၼ်ႈသေ ငဝ်မိုင် မိူၼ်ဢွၵ်းဢေႃဝူၼ်ႉသင်ဢမ်ႇဢွၵ်ႇ ၵႂင်လူင်ၵႂႃႇမူတ်း၊

ၶႃႈဝူၼ်ႉၼႅင်ၸႂ်လိူဝ်ပိူၼ်ႈ ၵွပ်ႈဝႃႈၶႃႈဝူၼ်ႉၽိတ်းမႃးယူႇၵူႈၶၢဝ်းယၢမ်း၊ ဝူၼ်ႉၶႂ်ႈမီးၸၢတ်ႈပၢၼ်လီ၊ ဝူၼ်ႉၶႂ်ႈမီး ၼႃႈႁိူၼ်းဢၼ်ဢုၼ်ႇၸႂ် ဢၼ်ၵျေႃႇမူၼ်ႈၸႂ်၊ ထိုင်ပေႃးလိုမ်းဝူၼ်ႉထိုင်ၵူၼ်းဢၼ်ပၼ်ၸၢတ်ႈပၢၼ်ၶႃႈၼႆႉမႃး၊

ၶႃႈဝူၼ်ႉဢမ်ႇဢွၵ်ႇဝႃႈ တေဢဝ်လွင်ႈတဵမ်ထူၼ်ႈၼႆႉ ၵႂႃႇလၢတ်ႈၼေၽႂ်ထွမ်ႇ၊ ၽွင်းမိူဝ်ႈၶႃႈဝူၼ်ႉၽိတ်း တေမီးၽႂ်ၸွႆႈဝူၼ်ႉၼေတၢင်းပၼ်ၶႃႈ၊ တေမီးၽႂ်ထူဝ်းမႃးထၢမ်ၶႃႈထႅင်ႈဝႃႈ ꧦၵိၼ်ၶဝ်ႈယဝ်ႉႁႃႉ? ႁဵတ်းၵၢၼ်ၸွင်ႇႁိူဝ်ႉႁိုဝ်ꧦ ၸဵမ်ၸိူဝ်းၼႆႉ၊ ထူဝ်းယဝ်ႉထူဝ်းထႅင်ႈ တေႃႈၼင်ႇႁူႉဝႃႈ ၶႃႈမိူဝ်ႇ ၶႃႈသုၵ်ႉသၵ်ႉ ၶႃႈၸႂ်လမ် ၵေႃႈယင်းတိုၵ်ႉထူဝ်းထၢမ် ၸွမ်းမႆႈၸႂ်ၸွမ်းယူႇၵူႈၶၢဝ်းယၢမ်း၊ ၽႂ်တေလၢတ်ႈထႅင်ႈဝႃႈ ႁဵတ်းၼၼ်လီ ႁဵတ်းၼႆလီ၊ ၽႂ်တေယွင်ႈယၢမ်းထႅင်ႈဝႃႈ ၶႃႈပဵၼ်ၵူၼ်းၵတ်ႉၶႅၼ်ႇ ပေႉသမ်ႉႁူႉဝႃႈၶႃႈႁဵတ်းသင်ဢမ်ႇပဵၼ်၊ ၽႂ်တေယူႇႁိမ်းၸမ်ပႂ်ႉပၼ်ႁႅင်းၶႃႈထႅင်ႈ ၽွင်းမိူဝ်ႈၶႃႈဢမ်ႇၵိုတ်းၽႂ်၊ ၶႃႈဝူၼ်ႉဝႃႈလွင်ႈတဵမ်ထူၼ်ႈ ဢမ်ႇၸႂ်ႈၶေႃႈတွပ်ႇတင်းမူတ်းၼႂ်းၸၢတ်ႈပၢၼ်။

ၶႃႈယုမ်ႇယမ်ဝႃႈ ပေႃႈ-မႄႈ ၵူႈၵေႃႉ ဢမ်ႇမုင်ႈမွင်းသင်ၼိူဝ်လုၵ်ႈလၢင်း၊ လိူဝ်သေလွင်ႈမႆႈၸႂ် လွင်ႈဢဝ်ၸႂ်သႂ်ႇၼိူဝ်ၶဝ်၊ ၶဝ်ဢမ်ႇမုင်ႈမွင်းဝႃႈ ႁႂ်ႈလုၵ်ႈလၢင်းမႃးယူႇႁိမ်းၸမ်ၶဝ်တႃႇသေႇ၊ ယဝ်ႉၵေႃႈဢမ်ႇမုင်ႈမွင်းဝႃႈ တေလႆႈမႃးလဵင်ႉလူလုမ်းလႃးၶဝ်၊ ဢၼ်ၶဝ်မုင်ႈမွင်းလိူဝ်သေပိူၼ်ႈတေႉ ပဵၼ်သဵင်ၶေႃႈၵႂၢမ်းဢွၼ်ႇဝၢၼ်ꧦ ဢၼ်ထၢမ်ထိုင် လွင်ႈပၢႆးယူႇလီၶဝ်၊ မႆႈၸႂ်ၼိူဝ်ၶဝ်၊ ပႂ်ႉပၼ်ႁႅင်းၸႂ်ၶဝ်၊ ၶေႃႈၵႂၢမ်းဢၼ်ဢမ်ႇပွႆႇၽႃႈဝၢင်းပႅတ်ႈၶဝ် ၵႃႈၼႆႉၵူၺ်းၵေႃႈၶဝ်မီးတၢင်းသိူဝ်းၸႂ်ၼႃႇယဝ်ႉ။

လိုၼ်းသုတ်းမႃး ၶႃႈဝူၼ်ႉဝႃႈ လွင်ႈတဵမ်ထူၼ်ႈ ၼႂ်းၸၢတ်ႈပၢၼ်ၼၼ်ႉ ပဵၼ်လွင်ႈဢၼ်လႆႈ လဵင်ႉလူလုမ်းလႃး တူၺ်းထိုင်ပေႃႈ - မႄႈ၊ ပႂ်ႉပၼ်ႁႅင်းပေႃႈ - မႄႈ ယၢမ်းမိူဝ်ႈဢမ်ႇယူႇလီ၊ ႁဵတ်းႁႂ်ႈလီသေပိူၼ်ႈ ၼင်ႇႁဝ်းပွင်ပဵၼ်လႆႈၼၼ်ႉ လိုၼ်းသုတ်း သင်ဝႃႈႁဝ်းလႆႈယၢၼ်ၵၼ်ၵႂႃႇၵေႃႈ၊ တေဢမ်ႇလႆႈဝူၼ်ႉသေ ၼဵင်ၸႂ် ၼမ်ႉတႃတူၵ်းဝၢႆးလင် မိူဝ်ႈၶဝ်ဢမ်ႇလႆႈႁပ်ႉႁူႉၸွမ်းသင်ယဝ်ႉ။

ၶေႃႈပၼ်တၢင်းႁၼ်ထိုင်- ၸိူင်ႉႁိုဝ်ၵေႃႈလီ သင်ဝႃႈလႆႈဢၢၼ်ႇ ၸိူင်းပွတ်းဢွၼ်ႇတွၼ်ႈၼႆႉယဝ်ႉၼႆ ႁႂ်ႈဢွၼ်ၵၼ်မေႃ ႁၵ်ႉပႅင်း မေႃတူၺ်းထိုင်လိုမ်းလႃး ၵေႃႉဢၼ်ပၼ်ၸၢတ်ႈပၢၼ်ႁဝ်းမႃးသေ ဢမ်ႇၵႃး လႆႈလဵင်ႉႁဝ်းမႃးတေႃႇပေႃးယႂ်ႇၼၼ်ႉတေႉꧦယူႇ၊ ဢၼ်ၸိူဝ်းယူႇၵႆၵေႃႈ ႁိုင်ꧦၼၢၼ်းꧦ ၼိုင်ႈလိူၼ်ၼိုင်ႈပွၵ်ႈဢမ်ႇဝႃႈ ထုၵ်ႇလီထူဝ်းသိုပ်ႇထၢမ်လွင်ႈပၢႆးယူႇလီၶဝ်ၸဝ်ႈယူႇၼႆ ၶႂ်ႈတိုၵ်းသူၼ်းၼင်ႇၼႆယဝ်ႉ။


ၸဝ်ႈၵွၼ်းၶမ်း ဢေႃးတိပ်ႉပ (မိူင်းသၢတ်ႇ)  
ပိၼ်ႇတႅမ်ႈ
4 / 7 / 2017   ( 6: 35 PM)